កំពង់ស្ពឺ៖ ស្រុកឧដុង្គនៃខេត្តកំពង់ស្ពឺ ត្រូវបានរដ្ឋាភិបាលកម្ពុជាបំបែកជា «ក្រុងឧដុង្គម៉ែជ័យ» និង «ស្រុកសាមគ្គីមុនីជ័យ»។ 

អនុក្រឹត្យរបស់រាជរដ្ឋាភិបាលដែលចេញផ្សាយនៅយប់ថ្ងៃទី២៣ ខែធ្នូ ឆ្នាំ២០២២ បានបញ្ជាក់ថា រដ្ឋាភិបាលបានសម្រេចកាត់យកឃុំចំនួន ៥នៃស្រុកឧដុង្គ គឺមានឃុំវាំងចាស់ ឃុំវាលពង់ ឃុំត្រាចទង ឃុំព្រះស្រែនិងឃុំក្សេមក្សាន្ត ពីស្រុកឧដុង្គ បង្កើតជា «ក្រុងឧដុង្គម៉ែជ័យ»។

សម្រាប់ឃុំចំនួន១០ទៀតនៃស្រុកឧដុង្គ រដ្ឋាភិបាលក៏បានសម្រេចកាត់សម្រាប់បង្កើតជា «ស្រុកសាមគ្គីមុនីជ័យ» ថ្មី។ ឃុំទាំង១០ដែលក្លាយជាភូមិសាស្ត្រស្រុកសាមគ្គីមុនីជ័យ គឺមានឃុំចាន់សែន ឃុំជើងរាស់ ឃុំជំពូព្រឹក្ស ឃុំក្រាំងចេក ឃុំមានជ័យ ឃុំព្រៃក្រសាំង ឃុំយុទ្ធសាមគ្គី ឃុំដំណាក់រាំង ឃុំពាំងល្វា និងឃុំភ្នំតូច។ 

ឃុំចំនួន៥នៃស្រុកឧដុង្គ នឹងក្លាយជាដីរបស់ក្រុងឧដុង្គម៉ែជ័យដែលមានសង្កាត់ចំនួន៥គឺ សង្កាត់វាំងចាស់ សង្កាត់វាលពង់ សង្កាត់ត្រាចទង សង្កាត់ ព្រះស្រែ និងសង្កាត់ក្សេមក្សាន្ត។ ទីតាំងរដ្ឋបាល ក្រុងឧដុង្គម៉ែជ័យ ត្រូវស្ថិតនៅក្នុងសង្កាត់វាលពង់។

ចំពោះស្រុកសាមគ្គីមុនីជ័យនឹងមានឃុំចំនួន ១០គឺ ឃុំចាន់សែន ឃុំជើងរាស់ ឃុំជំពូព្រឹក្ស ឃុំក្រាំងចេក ឃុំមានជ័យ ឃុំព្រៃក្រសាំង ឃុំយុទ្ធសាមគ្គី ឃុំដំណាក់រាំង ឃុំពាំងល្វា និងឃុំភ្នំតូច។ ទីតាំងរដ្ឋបាល ស្រុកសាមគ្គីមុនីជ័យ ត្រូវស្ថិតនៅក្នុងឃុំជើងរាស់៕